Tuesday, 5 June 2018

Wajasiriamali Mkalama wanufaika

PICHA 10 CHINI:  WAWAKILISHI WA VIKUNDI 10 VYA UJASIRIAMALI  WILAYANI MKALAMA WAKIPOKEA HUNDI ZA MIKOPO YA RIBA NAFUU  KUTOKA KWA MKUU WA WILAYA YA MKALAMA MHE. MHANDISI JACKSON MASAKA JIONI YA LEO.















Mkuu wa Wilaya ya Mkalama Mhe. Mhandisi Jackson Masaka jioni la leo amevikabidhi vikundi 10 vya ujasiriamali hundi zenye thamani ya jumla ya shilingi milioni 37.8  ikiwa ni sehemu ya utekelezaji wa Mwongozo wa bajeti wa Serikali unayoitaka kila Halmashauri kutoa asilimia 10 ya fedha zake kuviwezesha vikundi vya wanawake na vijana mikopo ya riba nafuu.

Fedha hizo zimekabidhiwa kwenye vikundi 10, saba vya vijana na vitatu vya wanawake ambapo baada ya kukabidhi hundi hizo Mhe. Masaka alivitaka vikundi hivyo kuhakikisha vinatumia fedha hizo kufanyia shughuli za maendeleo ili viweze kupata faida na kurejesha fedha walizopewa ili watoe fursa ya vikundi vingine kukopeshwa kwa haraka.

Kwa upande wake Mkurugenzi Mtendaji wa Halmashauri ya Wilaya ya Mkalama Mhandisi Godfrey Sanga alisema kuwa fedha Halmashauri hiyo itaendelea kutoa fedha zaidi  kwa vikundi kulingana na ongezeko la mapato yake ya ndani.

MKALAMA yafanya DCC ya kwanza leo





Mkuu wa Wilaya ya Mkalama Mhe. Mhandisi Jackson Masaka akihutubia wakati wa kikao cha Kamati ya Ushauri ya Wilaya (DCC) kilichofanyika leo katika ukumbi wa Halmashauri ya Wilaya hiyo.

Mkurugenzi Mtendaji wa Halmashauri ya Wilaya ya Mkalama Mhandisi Godfrey Sanga akizungumza machache kabla ya kumkaribisha Mgeni rasmi  wakati wa kikao cha Kamati ya Ushauri ya Wilaya (DCC) kilichofanyika leo katika ukumbi wa Halmashauri ya Wilaya hiyo.

Wajumbe mbalimbali waliojitokeza akihutubia wakati wa kikao cha Kamati ya Ushauri ya Wilaya (DCC) kilichofanyika leo katika ukumbi wa Halmashauri ya Wilaya hiyo.




Mkuu wa Wilaya ya Mkalama Mhe. Mhandisi Jackson Masaka leo ameongoza kikao cha kamati ya Ushauri ya Wilaya (DCC)  ambapo katika hotuba yake ametoa maelekezo mbalimbali kwa wadau na idara mbalimbali zilizopo Wilayani Mkalama.

Kikao hicho mbali na kuhusisha baraza lote la Madiwani, pia kilihusisha taasisi mbalimbali zinazoendesha shughuli zake Wilayni Mkalama, Watendaji wote wa kata, wawakilishi wa taasisi za dini na wawakilishi wa vikundi mbalimbali vya ujasiriamali.

Mhe. Masaka aliwataka wananchi na viongozi kutambua umuhimu wa wingi wa fedha zinazotolewa na serikali katika kuhudumia Eimu nchini kwa kuhimiza watoto kwenda shule, walimu kufanya kazi pindi wawapo shuleni na wazazi kuonesha mwamko wakati wa kuchangia huduma mbalimbali za uboreshaji wa Elimu za watoto wao.

“Jambo la pili nitumie fursa hii kuhimiza wakulima wote walime mazao ya mkakati ambapo kwa Wilaya yetu mazao hayo ni pamba, korosho, alizeti na Vitunguu” Aliongeza Mhe. Masaka.

Mhe. Masaka alisisitiza kuwa ili kilimo cha Mkakati kiweze kuwa na tija ni lazima wakulima watumie mbegu bora, wapande mazao yao kwa vipimo sahihi na watumie vipimo stahili katika uwekaji wa dawa za kuua wadudu wanaoathiri mazao hayo.

“Mawakala wa huduma za Misitu nchini (TFS) na idara ya Maliasili ni lazima waonekane wapo badala ya kuziachia serikali za vijiji  kesi za uvamizi wa maeneo ya misitu ingawa pia vijiji vyote vinapaswa kulinda maeneo yaliyotengwa kwa ajili ya misitu” Aliongeza Mhe. Masaka.

Mhe. Masaka alitumia fursa hiyo kusisitiza wananchi wajenge viwanda vidogo kama viwanda vya kukamua mafuta ya Alizeti na kuagiza kila mtu awaunge mkono wenye viwanda hivyo ili wafanikiwe na hatimaye waweze kufungua viwanda vikubwa.

“Sio Afisa afya anaenda kukagua kiwanda na kukuta mazingira yasiyoridhisha lakini badala ya kushauri namna ya kuboresha mazingira hayo anaamua kuchukua uamuzi wa kukifunga kiwanda hicho” Alisisitiza Mhe. Masaka.

Katika  hotuba yake Mhe. Masaka pia  alizitaka taasisi zote zinazofanya shughuli zake Wilayani Mkalama kuwa na mipango yenye mwelekeo mmoja ili kuhakikisha wananchi wanapata huduma zote za msingi kwa wakati badala ya huduma moja kusubiri uwepo wa huduma nyingine.

“Sio Tarura wanajenga barabara Kinyambuli, Halmashauri inaenda kujenga kituo cha Afya Gumanga, Tanesco wanapeleka umeme Kinyangiri na Idara ya Maji wanapeleka maji Ibaga, hapo mtakuwa hamjamsaidia mwananchi kwa sababu hata mkimpelekea kituo cha Afya kizuri, kama hakuna barabara nzuri kufika kwenye kituo hicho au umeme wa kutumia kituoni hapo itakuwa ni kazi bure” Alisema Mhe. Masaka.

Akihitimisha hotuba yake, Mhe. Masaka aliwaomba wananchi na taasisi za dini zilizopo wilayani Mkalama kuisaidia serikali kwa kutoa maeneo ambayo hawayatumii ili yatumike katika shughuli za Maendeleo.

“Msiishie tu kumiliki maeneo hayo bila kuyaendeleza kwa kufanya shughuli za Maendeleo hivyo kama ni kilimo limeni, kama ni viwanda wekeni viwanda na kama mlipanga kuweka taasisi za Elimu wekeni taasisi hizo” Alimalizia Mhe. Masaka.




Friday, 18 May 2018

Elimu Mkalama ibadilike kwa vitendo-Nchimbi

Mkuu wa Mkoa wa Singida Mhe. Daktari Rehema Nchimbi akisoma hotuba yake wakati wa kufunga maandhimisho ya Juma la Elimu, tukio lililofanyika leo mchana katika Viwanja vya Ofisi ya Halmashauri ya Wilaya ya Mkalama.

Mkuu wa Wilaya ya Mkalama akiwasalimia wananchi wote waliofika kwenye kilele cha maadhimisho ya Juma la Elimu,tukio lililofanyika leo mchana katika Viwanja vya Ofisi ya Halmashauri ya Wilaya ya Mkalama. 

Afisa Elimu wa Mkoa wa Singida Bi. Nelasi Mulungu akisoma jumla ya mambo mbalimbali yaliyoainishwa na timu ya wataalam wa  Wilaya ya Mkalama kwa kushirikiana na Mtandao wa Elimu Tanzania na wadau wengine mbalimbali wa Elimu kwenye kilele cha maadhimisho ya Juma la Elimu,tukio lililofanyika leo mchana katika Viwanja vya Ofisi ya Halmashauri ya Wilaya ya Mkalama. 

Mkuu wa Mkoa wa Singida Mhe. Daktari Rehema Nchimbi akiwa ameshikana mikono na  wageni waalikwa na wanafunzi wa shule ya Msingi Mbigigi kama ishara ya kutekeleza kwa vitendo kauli mbiu ya Juma la Elimu duniani isemayo "Uwajibikaji wa pamoja kwa Elimu bora kwa wote"


“Elimu ni moyo wa uhakika na hakikisho la uhai wa maendeleo endelevu ya familia, jamii na Taifa kwa ujumla”

Hayo ni maneno yaliyotamkwa na Mkuu wa Mkoa wa Singida Mhe. Daktari Rehema Nchimbi ambaye alikuwa Mgeni rasmi katika kilele cha maadhimisho ya Juma la Elimu tukio lililofanyika katika viwanja vya Ofisi ya Halmashauri ya Wilaya ya Mkalama.

Mhe. Nchimbi ambaye alimwakilisha Waziri wa Nchi Ofisi ya Rais Tawala za Mikoa na Serikali za Mitaa (OR-TAMISEMI) Mhe. Selemani Jafo, alitumia fursa hiyo kuwashukuru wadau wote wa elimu chini ya mwamvuli wa Mtandao wa Elimu Tanzania (TenMet) ambapo aliwataka watumie maadhimisho ya mwaka ujao kutoa majibu ya tathmini ya utekelezaji wa changamoto zote walizoziona katika Wilaya za Nanyumbu na Mkalama.

“Haiwezekani kila mwaka muwe mnazungumzia changamoto za aina moja hivyo ni lazima muweke mpango mzuri wa kufanya ufuatiliaji wa karibu wa utekelezaji wa changamoto zote mlizoziainisha” Alisisitiza Mhe. Nchimbi.

Mhe. Nchimbi aliushukuru uongozi na wananchi wa Mkalama kwa ujumla kwa kuahidi kubadilisha matokeo waliyoyapata mwaka jana ambapo aliwasisitiza wajikite zaidi kwenye mabadiliko ya vitendo badala ya maneno.

Kabla ya kutangaza kufunga maadhimisho ya juma la Elimu kwa mwaka huu, Mhe. Nchimbi aliendesha harambee ya kuchangia elimu Wilayani hapa ambapo jumla ya shillingi 600,000 zilipatikana.

Awali akizungumza maneno machache kabla ya kumkaribisha mgeni rasmi, Mkuu wa Wilaya ya Mkalama Mhe. Mhandisi Jackson Masaka alisema kuwa TenMet waliamini Mkalama bado ipo hai ndio maana walifika kuisaidia kuainisha sababu mbalimbali zilizosababisha kutokuwa na matokeo mazuri ambapo aliwaahidi kuwa Wilaya yake haitofanya vibaya tena.

Wakati huo huo Mhe. Masaka alitumia fursa hiyo kuwatakia kila la kheri waislam wote wa Wilaya ya Mkalama katika Mfungo wa Mwezi Mtukufu wa Ramadhani ambapo aliwataka wafanyabiashara wote Wilayani hapa kutopandisha bei za vyakula ambavyo hutumiwa kama futari na daku  katika kipindi hiki.

“Kamati ya Ulinzi na Usalama ya Wilaya itafuatilia kwa karibu sana utekelezaji wa agizo hili na atakayekiuka hatua za kisheria zitachukuliwa dhidi yake” Aliongeza Mhe. Masaka.




Monday, 14 May 2018

Singida haitakuwa ya mwisho tena- Nchimbi

PICHA TATU CHINI: MAANDAMANO YA AMANI YA WANAFUNZI HUKU WAKIWASILISHA KAULI MBIU MBALIMBALI KUHUSU ELIMU.






Afisa Mawasiliano na Mahusiano wa Shirika la Twaweza bw. Greyson Mgoy akimueleza kazi za shirika hilo Mgeni rasmi wa maadhimisho ya juma la elimu Mhe. Daktari Rehema Nchimbi 

Mbunge wa jimbo la Mkalama Mhe. Allan Kiula akizungumza machache wakati wa maadhimisho ya Juma la Elimu yaliyofunguliwa kitaifa leo Wilayani Mkalama.

Mkuu wa Mkoa wa Singida ambaye pia ndiye alikuwa Mgeni rasmi wa maadhimisho ya juma la Elimu Mhe. Daktari Rehema Nchimbi akitoa hotuba wakati wa maadhimisho ya Juma la Elimu yaliyofunguliwa kitaifa leo Wilayani Mkalama.

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo akisalimiana na Mkurugenzi Mtendaji wa Halmashauri ya Wilaya ya Mkalama Mhandisi Godfrey Sanga muda fupi baada ya kuwasili katika ofisi za halmashauri hiyo.

Mkuu wa Wilaya ya Mkalama Mhe. Mhandisi Jackson Masaka akiteta jambo naWaziri wa Nchi Ofisi ya Rais Tawala za Mikoa na Serikali za Mitaa (OR-TAMISEMI)  Mhe. Selemani Jafo muda mfupi baada ya Mhe. Jafo kuwasili katika Ofisi za Halmashauri ya Wilaya ya Mkalama.

Wilaya ya Mkalama leo imeingia katika moja ya rekodi za Kitaifa baada ya kufungua rasmi maadhimisho ya juma la Elimu kwa mwaka huu.

Mgeni rasmi katika maadhimisho hayo ya kitaifa mwaka huu alikuwa ni Mkuu wa Mkoa wa Singida Mhe. Daktari Rehema Nchimbi ambapo pamoja na mambo mengine alitumia hotuba yake kusisitiza Mtandao wa Elimu kutangaza mambo mazuri yanayofanywa na serikali katika sekta hiyo.

“Kauli mbiu yenu ya uwajibikaji wa pamoja katika kuinua elimu nchini inapaswa kutekelezwa kwa vitendo na jamii yote ya Mkalama kwa sababu sioni sababu ya wazazi wa wanafunzi wa Mkalama kushindwa kuchangia chakula cha watoto wao shuleni wakati nina ushahidi kuwa wazazi hawa ni wakulima wazuri” Aliongeza  Mhe. Nchimbi.

Mhe. Nchimbi aliwataka wananchi watumie vizuri mbegu za pamba na korosho walizopewa na serikali bila malipo yoyote kuhakikisha wanapata mavuno mengi yatakayowasaidia kuchangia elimu.

“Kuanzia sasa ninaagiza shule zote za sekondari hapa Singida ni lazima ziwe na mabwawa ya kufuga samaki ambapo mbali na kupata chakula kupitia mabwawa hayo pia kitakuwa ni chanzo kizuri cha mapato kwa kila shule kwa sababu soko la samaki ni kubwa sana hasa Mkoa jirani wa Dodoma, mtapata, hili sio ombi ni lazima! Alisisitiza Mhe. Nchimbi.

Mhe. Nchimbi aliwaagiza wakurugenzi wote wa Halmashauri zilizopo Mkoani Singida kuhakikisha wanampa taarifa za utekelezaji wa agizo hilo kila ifikapo mwisho wa Mwezi  na taarifa hizo  apatiwe moja kwa moja katika ofisi yake.

“Tunawashukuru sana TenMet kwa kutuandalia juma hili na tunawaahidi haya mema yote mliyotupa tutayarudisha kwa mema pia na kwa mchango Mkubwa ambao serikali ya awamu ya tano imetoa katika Elimu ya Mkalama hatuwezi kubaki nyuma tena na safari hii tunataka kama tukiwa wa mwisho basi tuwe wa mwisho kwa ufaulu wa asilimia 90” Alimalizia Mhe. Nchimbi.

Wakati huo huo  Wilaya ya Mkalama ilipata ugeni wa ziara ya muda mfupi ya Waziri wa Nchi Ofisi ya Rais Tawala za Mikoa na Serikali za Mitaa (OR-TAMISEMI) Mhe. Selemani Jafo ambaye alifika kwa ajili ya kukagua thamani ya fedha kulingana na ubora wa jengo la Ofisi ya Halmashauri ya Wilaya ambapo aliridhika na kazi iliyofanyika  kwa awamu ya kwanza na kumuagiza Mkurugenzi Mtendaji wa Halmashauri ya Wilaya ya Mkalama Mhandisi Gofrey Sanga kuhakikisha viwango hivyo vya ubora vinazingatiwa katika ujenzi wa awamu ya pili ya Ofisi ya hiyo.

“Mkalama ni moja ya Wilaya change hivyo inahitaji kupewa kipaumbele katika miradi mbalimbali na nikuhakikishie Mhe. Mkuu wa Mkoa, Wizara yangu itahakikisha Mkoa wa Singida kwa ujumla unasonga mbele” Aliongeza Mhe. Jafo.

Mhe. Jafo pia alisema kuwa mbali na kujenga vituo viwili vya Afya vya Kisasa ambavyo ni Kinyambuli na Mkalama, Kwa Mkoa wa Singida serikali ya awamu ya tano imetenga fedha za ujenzi wa hospitali mbili za Wilaya ambazo zitajengwa katika Wilaya ya Mkalama na Singida vijijini.

“Naomba nitumie fursa hii kukutamkia wazi Mkuu wa Mkoa na wananchi wote wa Singida vijijini kwa ujumla kuwa hospitali ya Wilaya Singida Vijijini itajengwa Ilongelo na sitaki mtu yoyote ahangaike kuja ofisini kwangu kujadili juu ya hilo, mimi nimeshalimaliza kwa sababu nachoangalia mimi ni kupeleka hospitali sehemu ambayo nina uhakika wananchi wengi zaidi watapata huduma na sio kundi la watu wachache wanaojaribu kuangalia maslahi yao kisiasa” Alimalizia Mhe. Jafo.





Tuesday, 8 May 2018

Mkalama yatengewa fedha za hospitali ya Wilaya

Mkurugenzi Mtendaji wa Halmashauri ya Wilaya ya Mkalama Mhandisi Godfrey Sanga akizungumza kabla ya kumkaribisha Mwenyekiti ili aweze kufungua baraza la madiwani lililofanyika leo.

Baadhi ya madiwani wakipitia nyaraka mbalimbali wakati wa baraza la madiwani lililofanyika leo.

Makamu Mwenyekiti wa Halmashauri ya Wilaya ya Mkalama Mhe. Loth Dia akisoma taarifa ya kamati yake ya Fedha, Mipango na Utawala wakati wa baraza la madiwani lililofanyika mapema leo.

Mwenyekiti wa Halmashauri ya Wilaya ya Mkalama Mhe. James  Mkwega  akizungumza machache muda mfupi kabla ya kufunga baraza la madiwani lililofanyika leo.

Mwenyekiti wa kamati ya Uchumi na Mazingira Mhe. Mohamed Juma akisoma taarifa fupi ya kamati yake wakati wa baraza la madiwani lililofanyika leo.


Baada ya jitihada za muda mrefu zilizofanywa na viongozi wa Halmashauri ya Wilaya ya Mkalama, hatimaye serikali ya Jamhuri ya Muungano wa Tanzani kupitia bajeti ya Wizara ya Afya ya mwaka 2018/2019  imeidhinisha kiasi cha shilingi bilioni 1.5 kwa ajili ya ujenzi wa hospitali ya Wilaya.

Habari hiyo njema imetolewa na kuthibitishwa na Mbunge wa jimbo la Mkalama Mhe. Allan Kiula wakati wa kikao cha baraza la robo ya pili la madiwani lililofanyika mapema  leo katika Ofisi ya Halmashauri hiyo.

“Upatikanaji wa hospitali itakuwa ni ukombozi mkubwa sana kwa wananchi wa Mkalama ambao kwa muda mrefu wamekuwa wakikosa huduma muhimu na za msingi  za matibabu” Alisema Mhe. Kiula.

Mkurugenzi Mtendaji wa Halmashauri ya Wilaya ya Mkalama Mhandisi Godfrey Sanga amesema hospitali hiyo itajengwa kwa mtindo wa ghorofa na tayari eneo itakapojengwa hospitali hiyo limeshatengwa na miundombinu ya barabara kuelekea kwenye hospitali hiyo tayari imeshawekwa.

Akizungumzia jambo hilo kabla ya kufunga baraza la leo, Mwenyekiti wa Halmashauri ya Wilaya ya Mkalama Mhe. James Mkwega amempongeza mbunge wa jimbo la Mkalama Mhe. Allan Kiula kwa ushirikiano mkubwa alioutoa katika kipindi chote cha ufuatiliaji wa kuhakikisha fedha hizo zinatengwa.

“Pia ingawa wanasema beki hasifiwi, nitumie fursa hii kukupongeza sana Mkurugenzi Mtendaji kwa utendaji wako mzuri uliosaidia jambo hili kufanyika kwa sababu pamoja na sifa nzuri zinazokuja kwetu wanasiasa bado ukweli unabaki kuwa nyie watendaji ndio wafanikishaji wa haya mambo kwa kiasi kikubwa sana” Alimalizia Mhe. Mkwega.


Uidhinishwaji wa fedha za ujenzi wa hospitali ya Wilaya inakuwa ni muendelezo wa habari njema katika sekta ya Afya Wilayani Mkalama  baada ya siku kadhaa zilizopita kupokea vifaa tiba vyenye thamani ya zaidi ya shilingi milioni 300 na serikali kutoa zaidi ya shilingi milioni 400 za Uboreshaji wa kituo cha Afya cha Kinyambuli ambao upo katika hatua za mwisho kukamilika.




MASWALI NA MAJIBU YA BARAZA LA MADIWANI LILILOFANYIKA LEO MEI 08, 2018.

Swali la 1.    Mhe. Amri Gyunda (kata ya Msingi): Ni lini Mbwa wanaozurula mitaani Wilayani Mkalama watawekewa utaratibu mzuri ili wasiendelee kuleta madhara kwa wananchi?

Jibu: Mhandisi Godfrey Sanga (DED)- Mbwa wote wanapaswa kuwekwa katika mazingira mazuri na kufungwa na wamiliki wao lakini kutokana na hoja yako Mhe. Amri, tutaanza kuwachukulia hatua wamiliki wote wanaoacha mbwa wao wazurule ovyo mitaani.

Swali la 2. Mhe. Eunick Kalaila (Viti maalum Kinyangiri): Ni lini huduma ya baraza la ardhi la Wilaya itaanza kutolewa Wilayani Mkalama?

Jibu: Mhandisi Godfrey Sanga (DED)- Taratibu zimefanyika na wahusika walifika hapa Wilayani kwa ajili ya kukagua jengo lililopendekezwa kufanyia baraza hilo hivyo tunachosubiri hivi sasa ni mrejesho wa ukaguzi wao kama wameridhika na jengo hilo au la.

Swali la 3. Mhe. Bilal Msengi (kata ya Tumuli):  Ni lini jina la jimbo la Iramba Mashariki litabadilishwa na kuitwa jimbo la Mkalama?

Jibu: Mhandisi Godfrey Sanga (DED)- Suala la kubadilisha majina ya majimbo lipo chini ya Tume ya Uchaguzi lakini tayari tulishawaandikia na tunachosubiri hivi sasa ni majibu kutoka kwao.

Jibu la Nyongeza- Mhe. James Mkwega (Mwenyekiti wa Hw)- Waheshimiwa madiwani mimi nadhani jina Iramba Mashariki lingebaki kuwa hivyo kwa sababu tukibadilisha jina tutapoteza asili yetu na ikumbukwe jina hili linamaanisha sisi ni watu wa Iramba.

Swali la Nyongeza. Mhe. Bilal Msengi (kata ya Tumuli: Kuna mpango gani wa kutenga maeneo maalum kwa ajili ya watu jamii ya wahadzabe ili waweze kufanya shughuli zao za maendeleo?

Jibu: Mhandisi Godfrey Sanga (DED)- Ni kweli jamii ya wahadzabe ni watu maalum sana na ni moja ya alama inayotutangaza vizuri nje ya hapa lakini kutokana na mpango wa kukabiliana na uharibifu wa Mazingira, mipango inafanyika ili kutenga maeneo rasmi kwa ajili ya wahadzabe kufanya shughuli zao.

Jibu la Nyongeza- Mhe. Allan Kiula (MB)- Madiwani wote tunapaswa kuwa wasimamizi wa matumizi bora ya ardhi na maeneo hivyo ni wajibu wetukukaa na kuweka mkakati wa pamoja wa kuhakikisha kila kata inakuwa na mpango wa matumizi bora ya Ardhi.

Swali la 4. Mhe. Omary Nzia (kata ya Miganga): Ni kwa nini Maafisa watendaji wa wa vijiji wanalipwa nusu ya malipo wanayostahili wakati wa kustaafu?

Jibu: Khashim Lugome (Afisa Utumishi) – Hakuna afisa Mtendaji anayelipwa nusu ya mafao yake kwa sababu wote wanalipwa kutokana na mchango waliochangia na pia wamekidhi vigezo vya msingi kwa kuchangia miezi 180 ya utumishi mfululizo.

Kama mtumishi yoyote aliajiriwa na Halmashauri na kulipwa mshahara wake wote na Halmashauri bila kukatwa makato yoyote kisha akaajiriwa na kwa mkataba wa kudumu na serikali ni wazi hatopata mafao ya kipindi alichokuwa na mkataba wa muda kwa sababu hakuwa akikatwa.

Swali la 5. Mhe. Abiba Omary (kata ya Kinampundu viti maalum): Eneo lililotengwa hapo awali kwa ajili ya matumizi ya kujenga uwanja wa mpira wa miguu limebadilishwa matumizi na kuwa eneo la Soko, je lipo eneo lililotengwa kwa ajili ya Uwanja?

Jibu: Mhandisi Godfrey Sanga (DED)- Ndio lipo eneo lililotengwa kwa ajili ya ujenzi wa uwanja wa mpira wa miguu katika kijiji cha Maziliga.


Monday, 30 April 2018

Chanjo zinaokoa gharama za matibabu-Masaka

Mkuu wa Wilaya ya Mkalama Mhe. Mhandisi Jackson Masaka akitoa hotuba katika uzinduzi wa chanjo ya saratani ya mlango wa kizazi uliofanyika katika zahanati ya Nduguti leo asubuhi.

Diwani wa kata ya Nduguti Mhe. Loth Dia akizungumza katika uzinduzi wa chanjo ya saratani ya mlango wa kizazi uliofanyika katika zahanati ya Nduguti leo asubuhi.

Mratibu wa Afya ya Mama na Mtoto  (DRCHCO) Wilayani Mkalama Daniel Basso akisoma taarifa fupi kuhusu saratani ya Mlango wa kizazi katika uzinduzi wa chanjo ya saratani hiyo uliofanyika katika zahanati ya Nduguti leo asubuhi. 

Kaimu Mkurugenzi wa Halmashauri ya Wilaya ya Mkalama ndugu Abdallah Njelu akizungumza machache kabla ya kumkaribisha mgeni rasmi katika uzinduzi wa chanjo ya saratani ya mlango wa kizazi uliofanyika katika zahanati ya Nduguti leo asubuhi.  

Mganga wa Zahanati ya Nduguti, Dokta Lazaro Chambo akitoa chanjo kwa mmoja wa wanafunzi waliofika katika uzinduzi wa chanjo ya saratani ya mlango wa kizazi uliofanyika katika zahanati ya Nduguti leo asubuhi.

Mkuu wa Wilaya ya Mkalama Mhe. Mhandisi Jackson Masaka akikabidhi dawa ya chanjo ya saratani ya Mlango wa kizazi kama ishara ya uzinduzi wa chanjo hiyo uliofanyika katika zahanati ya Nduguti leo asubuhi.

Mkuu wa Wilaya ya Mkalama Mhe. Mhandisi Jackson Masaka (kushoto walioketi) akiwa na Diwani wa Kata ya Nduguti Mhe. Loth Dia (katikati), Katibu wa Umoja wa wanawake Wilaya Fatuma Ndee na wataalam wengine wakiwa katika picha ya pamoja na wanafunzi wa shule ya sekondari Nduguti.



“Jamii iliyopata chanjo ni jamii yenye Afya, Timiza wajibu wako” Ni kauli mbiu iliyobeba kampeni ya chanjo ya saratani ya mlango wa kizazi kwa wasichana wenye umri wa Miaka 14 iliyozinduliwa rasmi leo Wilayani Mkalama.

Uzinduzi huo ambao ulihudhuriwa na wananchi, viongozi mbalimbali wa dini na jamii, wanafunzi wa sekondari na wataalam mbalimbali kutoka Halmashauri ya Wilaya ya Mkalama ulifanywa na Mkuu wa Wilaya ya Mkalama Mhe. Mhandisi Jackson Masaka.

Katika uzinduzi huo Mhe. Masaka aliwasisitiza wananchi kuwapeleka watoto wao wa kike wenye umri wa miaka 14 ili wakapate kinga ya saratani hiyo ambayo kila mwaka husababisha vifo vya wanawake 4216 hapa nchini.

“hii ina maana kila siku wastani wa wanawake 11 hufariki dunia hapa nchini kutokana na saratani hii takwimu ambayo ni kubwa sana hivyo wananchi tuhakikishe tunawapa mabinti zetu chanjo hii ili kushusha na kutokomeza kabisa  ugonjwa huu kwa akinamama” Aliongeza Mhe. Masaka.

Mhe. Masaka alisisitiza kuwa wananchi wakipata chanjo itawapunguzia gharama za matibabu kwa sababu suala hilo hivi sasa limekuwa mzigo mkubwa sana kwa mwananchi wa kawaida.

Akizungumza kwa niaba ya Mwenyekiti wa Halmashauri ya Wilaya ya Mkalama, Makamu Mwenyekiti wa Halmashauri ya Wilaya ya Mkalama Mhe. Loth Dia aliwataka wananchi wa Wilaya ya Mkalama kuondoa dhana potofu kuwa chanjo huongeza zaidi maradhi na kuwataka kujitokeza kwa wingi katika vituo vya kutolea chanjo hiyo.

“Siku za nyuma wanawake wengi walipoteza maisha kwa sababu hakukuwa na chanjo ya Ugonjwa huu hivyo tunaishukuru serikali kwa kuokoa maisha ya kizazi kilichopo kutokana na ugonjwa huu wa saratani ya Mlango wa kizazi na wananchi tuiunge Mkono kwa kuhakikisha watoto wetu wanajitokeza kwa wingi kwenda kupatiwa chanjo hii” Alisema Mhe. Dia.

Kwa mwaka 2018 Wilaya ya Mkalama imelenga kutoa chanjo kwa wasichana 2783 ambao walizaliwa mwaka 2004.

Saturday, 28 April 2018

MKALAMA YASHEREHEKEA SIKU YA MKULIMA

Mkuu wa Wilaya ya Mkalama Mhe. Mhandisi Jackson Masaka akihutubia leo katika sherehe za Siku ya Mkulima zilizofanyika katika kijiji cha Kidarafa.

Mwakilishi wa Kampuni ya Usambazaji wa mbolea inayojulikana kifupi kama "ETG" ndugu Cosmas Maganga akitoa maelekezo juu ya namna ya kutumia  moja ya dawa za kuua wadudu shambani wakati wa sherehe za siku ya Mkulima zilizofanyika leo katika kijiji cha Kidarafa.

Mkurugenzi wa Kampuni inayojulikana kama "Meru Agro tours" Bi. Cecilia Magesa akitoa maelezo ya njia za kupata mazao ya kutosha kwa Mkulima wakati wa sherehe za siku ya Mkulima zilizofanyika leo katika kijiji cha Kidarafa.



Wilaya ya Mkalama leo imefanya sherehe za siku ya Mkulima iliyofanyika katika kijiji cha Kidarafa kwa kuwajengea uwezo wakulima kutambua umuhimu wa kutumia pembejeo bora na za kisasa.

Sherehe hizo zilizofanyika kwa mtindo wa Warsha fupi kwa wakulima juu ya matumizi sahihi ya mbegu na mbolea iliwezeshwa na wasambazaji maarufu wa pembejeo za kilimo wanaojulikana kama “BAYDA AGROVET”  wakishirikiana na Kampuni ya kizalendo ya uuzaji wa mbegu bora na za kisasa, viautilifu na madawa mbalimbali ya mimea inayojulikana kama “Meru Agro tours” yenye makao yake makuu Mkoani Arusha.

Mkuu wa Wilaya ya Mkalama Mhe. Mhandisi Jackson Masaka ambaye pia alikuwa Mgeni rasmi katika sherehe hizo,  alitumia sehemu kubwa ya hotuba yake kuwasisitiza wakulima kutumia vyema elimu waliyopewa  katika warsha hiyo kuhakikisha wanafanya kilimo bora na cha kisasa.

Mbali na msisitizo huo, Mhe. Masaka pia alitumia fursa hiyo kuwatahadharisha wakulima wote Wilayani hapa wahakikishe wanapata pembejeo kwenye maduka rasmi na waombe risiti ya kuthibitisha manunuzi yao.

“Epukeni kununua pembejeo kwenye minada au maduka yasiyo rasmi kwa sababu tutashindwa kumpata muuzaji pindi ikigundulika kuwa bidhaa uliyonunua ni feki” Alisisitiza Mhe. Masaka.

Mpaka sasa kampuni ya “Meru Agro tours”  imefanikiwa  kutoa elimu kwa wakulima kutoka katika kata tano za Mwanga, Nduguti,Ilunda, Nkalankala na Kinampundu.

Mafunzo hayo ambayo yalijumuisha wakulima mmoja mmoja 42 na vikundi 25 vyenye jumla ya wakulima 625 yalienda sambamba na ugawaji wa kilo 133 za mbegu bora za mahindi zenye thamani ya shilingi 798,000, kilo 300 za mbolea aina ya DAP, kilo 300 za mbolea aina ya Urea na kilo 50 za mbolea aina ya Kyno vyote vikigharimu shilingi 648,000 na hivyo kufanya jumla ya mchango uliotolewa na kampuni hiyo Wilayani Mkalama  mpaka sasa kufikia kiasi cha shilingi milioni 1,446,000.

Siku ya Mkulima Wilayani Mkalama huadhimishwa kila mwaka muda mfupi kabla ya kuanza kwa msimu wa mavuno ya mazao mbalimbali.




HALMASHAURI YA WILAYA MKALAMA